前言

多得「香港航空」新開香港至岡山航線，先有今次岡山，四國，淡路自駕遊嘅安排。八日七夜，本來想岡山，遊勻四國，廣島，再返岡山回程，做完research後發覺起碼要兩至三個禮拜，所以決定今次只去岡山加兩國香川懸，德島懸， 再加淡路島，行程已經非常豐富！下次行程就會飛廣島, 再加另外兩國愛媛懸同高知懸。

小豆島

去小豆島其實係未出發先興奮。非常多景點，上山落海，小小島嶼可以由朝玩到晚無停過，但又可以好relax， 一啲都唔趕。自駕遊由高松港出發，連人帶車大概五千幾yen。其實去之前一日先發覺可以提早預約，最遲之前一晚七點前都可以book，但發覺時已經晚上九點幾，攪到成晚囉囉攣怕上唔到船。上網睇背包客棧話其實都唔駛擔心，但怕車位已滿，所以決定第二朝八點前到碼頭視察情況。

一駛入碼頭，已經有工作人員勁對我哋揮手，問係咪去小豆島，原來剛有一班慢船要出發！

高松港坐渡輪到小豆島，目的地分別有土庄港，池田港，同草壁港。大部分遊客都會以土庄港做起點，方便來回高松或岡山。由高松港去土庄港大概60分鐘船程，亦有35分鐘高速航班，但車就上唔到渡輪。真係天意俾到我哋上船，唔駛等下班九點鐘！

小豆島乃瀨戶內海裡面嘅第二大島，僅次於淡路島。以日本橄欖樹栽培發源地而聞名。

如果要深度遊，一整日係唔足夠。我哋於是選定今次行程：銚子渓 -- 寒霞溪 -- 星ヶ城 -- 丸金醬油廠 -- 二十四之瞳電影村 -- 小豆島橄欖公園 -- 以天使的散步道為終點。每個景點逗留時間因人而異，以下逗留時間只作為一個參考。


銚子渓 （30分鐘）

今日朝早天陰陰，舊黑雲跟住我哋行，希望稍後會好轉。由土圧港到銚子渓大概15分鐘車程，買咗入場券，一條直路望入去已經見到好多猴子周圍走，無圍欄，遊客可以近距離接近。香港馬騮山嘅猴子好具侵略性，又會搶奪遊客手袋，食物，但銚子渓由於唔准外來人士餵飼猴子，而遊客亦好聽話無犯規，所以猴子視我哋為玻璃人，你睇我唔到！逗留一陣細心觀察班猴子嘅一舉一動，發覺佢哋都有好幾個大佬，啲細嘅都唔敢走近，一埋身就俾大佬兇走！猴子生活好優閒，平時都係你兇吓我，我兇番你，跳吓樹，互相幫大家捉吓蝨咁。記得門口寫住1010分會有表演，就走過去睇吓。原來已經尾聲，都睇到隻明星仔表演咗一段。

寒霞溪 (30分鐘)

日本三大溪谷美之一，亦屬於「日本自然百選」其一，可以話係小豆島其中一個最高點，眺望瀨戶內海嘅最佳景點。舊污雲仍然蓋頂，但都清晰睇到附近青翠山嶺，及遠望附近島嶼。影完相本應諗住坐寒霞溪ropeway，但因為當時仲未到紅葉嘅季節，其實都冇乜嘢睇，所以決定就咁到此一遊。離開時睇地圖發覺附近好多步行道，包括表神懸12景之道(2.3km)，及裡神懸8景之道(1.8km)。由於冇預計會hiking，所以睇完一輪就決定再闖高峰，去小豆島最最最高點 -- 星ヶ城。


星ヶ城 (45分鐘)

星ヶ城冇喺預計行程裏面，但見有一條小小步道徑可以上到山頂，所以駕車到三笠山腳停車處。未到入口都覺得甘甘地，周圍都係密密麻麻高聳入雲嘅樹木，小徑頗窄，路面極之不平，滿地好多樹枝及碎石。但洗濕咗個頭，點都要行埋去。不過喺裡面景色其實好靚，陽光滲入嚟，雖然陰森，但平日絕少機會會行呢種山徑，都行得頗enjoy。其實沿途一個人都冇，都有點寒寒地。差不多20分鐘，終於到星ヶ城東峰，乃小豆島最高峰，海拔高度816公尺。雖然冇大地在我腳下嘅感覺，但都停留咗一陣，吹吹風，觀賞吓景色，等對腳冇再發軟蹄先回程落山。


丸金醬油紀念館 (30分鐘)

落山之後下一站就係坂手港附近嘅「丸金醬油紀念館」。醬油乃小豆島最重要，最傳統嘅產業。由於瀨戶內海嘅氣候非常適宜釀造醬油用嘅酵母菌，所以除咗丸金，小豆島都有好多大大小小不同嘅醬油廠。不過要去，就梗係去規模最大，最多人認識嘅丸金！一落車，已經聞到獨特濃烈嘅醬油味，無論行都邊，都會聞到呢個味道。紀念館內展出呢間百年醬油廠嘅歷史，講及醬油嘅提煉，及生產用嘅工具。而遊客仲可以用手觸摸工具，感受一下醬油工人當年冇機器附助，用又高又長嘅棍去攪動製油。

紀念館旁邊就一定唔少得購買醬油產品嘅店舖。裡面有林林總總嘅產品，我就揀咗兩支柚子醬油用嚟打邊爐。


二十四之瞳電影村 (120分鐘)

呢個景點嚟小豆島一定要到嘅地方，係改編自日本知名作家壺井榮作品嘅電影「二十四隻眼睛」喺1950年拍攝時所搭建嘅外景場地，完成拍攝之後變為旅遊景點。整個映畫村莊大概一萬平方米，可以沿著海岸俯瞰整個無敵瀨戶內海。